Dhokha

 Filmon mein dikhaate hain,

ho sakta hai sach bhi ho.

Pehle aksar ghoonghat ke peeche ladki badal jaati thi.

Asli bhaag gayi, kisi aur ko baitha diya mandap mein.

Aur reveal suhaagraat mein hua. 

Aise hi itna tavazzo dete thay film vale.

Voh ek din ka dhokha hota hai.

Zindagi bhar ka dhokha tab hota hai,

jab aap apne asli chehare pe ghoonghat daal mandap mein baithate ho.

Maqsad

Kehte hain oopar kuch nahin le jaata koi

Hum phir bhi yeh guzaarish liye jaayenge

Ek umar toh maqsad pehchaan'ne mein nikal gayi

Ek aur mil jaaye

Toh poora kar aayenge

Kaisa shehar hai yeh.

Har shaam ghar lautate dhoondta hun voh mutton ki dukaan,
Ki ek-aadh kilo khareed bachpan vaali rasoi juta lun,
Papa style mein do peg laga bhuna gosht bana lun,
Yahan kaanch mein lipti, mehekti air-conditioned ‘shop’ mein,
Voh khoonte pe betarteeb se latke bakre ki dukaan ka musalmaan nahin milta,
Kaisa shehar hai yeh, jahan apna makaan nahin milta.

Kisi subah jab postman padosi ki chhitthi galti se le aata hai,
Aur poochhta hai ki kya aapki building mein falaan-falaan rehte hain,
Muh se nikal jaata hai naam kya jaanun, floor batao,
Band muh bolti aankhon se kehta hai postman, ‘Vahi jahan padosi ko naam nahin milta’,
Kaisa shehar hai yeh, jahan apna makaan nahin milta.

Koi chhutti ke din bistar pe karvatein badalte,
Jab mobile pe kisi rishtedaar ka naam chamakta hai,
Main ‘ignore’ karta hun voh bhoole-bisre din,
Jab rishtedaaron ke yahan taash ke patton ki chhaon mein,
din ka raat aur raat ki subah ho jaati thi,
Ghar der se pahunchane pe haaye-hatya ho jaati thi,
Ek facebook account, do phone, teen email pe rishtedaaron ka farmaan nahin milta,
Kaisa shehar hai yeh, jahan apna makaan nahin milta.

Pritish Nandy Sahab, Salaam Vaalequm.

Suna aap kaafi naraaz hain Hindi se. Kahin aapko ek nayi bhasha mili, khoobsurat lagi, aur aapko yaad aaya, "Arrey, yeh meri rashtriya bhasha kyun nahin."

Jaagruk naagrik hain aap. Baat baat par desh ki identity ki yaad aa jaati hai aapko.

Jaagruk hone ke saath saath thode padhe likhe bhi hote, toh jaante kuch zaroori baatein.

Duniya mein kam se kam ek hazaar 'base' rang hain. Unmein se kai aapko desh ke alag alag raajyon ki yaad dilaayenge. Saare ke saare daal den National Flag par?

Kuch lakh kism ki jaanwaron ki prajaatiyaan hain. Bana den sabko national animal?

Har teesra bhartiya kaam chalau gaana likh sakta hai. Aapke kisi non-Delhi (non-Hindi) rishtedaar se gaayki kara ke nayi national anthem ho jaaye?

Zaroori nahin lagta? Kyun? Kyunki in cheezon ka Dilli se koi talluk nahin? Inke rashtriya symbol hone mein Dilli ki taaqat nahin badhti?

Jin North East ki ek aadha darzan bhashaaon ki jaankaari aapne di, voh maine pehli baar suni. Poora yakeen hai hummein se kaion ne nahin suni hongi. Nayi rashtriya bhasha ki ghoshna karte waqt agar bhasha sikhaani bhi pade, toh thodi sharam ki baat hogi.

Aapke lekh mein in raajyon ki bhasha aur sanskriti ki guhaar dikhi. Lekin guhaar ka asli kaaran lupt hoti sanskriti nahin, Hindi ke khilaaf morcha laga. Sanskriti bachaane ke liye Hindi ka khaatma kyun? Hindi ki vajah se North East ki apni language nahin bach pa rahin? Kyun? Aapko lagta hai vahan paida hone vaale bachche ek se zyaada bhasha paal nahin paayenge? Sahab, apni IQ ko dimaag mein rakh kar sabke liye decide toh aap kar rahe hain, par mujhe nahin lagta bhagwaan ek hi galti baar baar dohraata hoga.

Hindi se dikkat hai aapko? Saalon se rashtriya bhasha bani is language ka haal bataun main aapko? Yeh lekh angrezi ki sahaayta, roman mein likh raha hun main. Kyunki Devnagari mein likhate hi aadhe padhne vaale padhenge nahin. Yeh haalat hai Hindi ki.

Agar aapka voh Kashmiri aur voh North Eastern Hindi jaanein, jaisa ki sanvidhaan unse asha rakhta hai, toh identity issues bahot kam ho jaayenge. Sawaal yeh hai ki Hindi kyun? Phir sawaal yeh bhi ki baaki 100-200 bhashaayen kyun nahin? Kuch teen chaar sadiyon mein toh hum sab ek bhasha mein baat karna seekh hi jaayenge. Hindi zyaadatar logon ko samajh aati hogi tabhi national language hai. Tabhi film banaate waqt aap zyaada se zyaada logon tak pahunchane ke liye isse chunate hain. Isse Dilli ki rakhel ki tarah na pesh karein.

National language 'all pervasive' nahin hogi toh aap aur hum honge?

Mujhe nahin lagta Hindi bolane vaale kisi bhi aadmi ko aapki in tamaam bhashaaon se koi dikkat hai. Mujhe nahin lagta hummein se koi bhi chahega ki desh ki koi bhi jama poonji samay ke saath gart mein chali jaaye. Lekin aapki Hindi ke liye nafrat, aur uska Dilli se koi ajeeb sa naata meri samajh ke bahar hai. Main UP se hun. Apne Dilli ke saat saalon mein mujhe nahin lagta iss shehar ke bahot log mujhse behtar Hindi bolate, likhate ya samajhate hain.

Aapka logic hai ki desh ki har sanskriti co-exist kare, aur iske liye aap Hindi ko mitaana chahte hain. Kya yakeen karun main aapka?

Kuch galat likha ho toh maaf kijiyega. Hindi bhashi aadmi hun, ho sakta hai aapke angrezi lekh ki gehraai na samajh paaya hun.

Par itna neeche shayad main kabhi gir bhi nahin sakta.

http://blogs.timesofindia.indiatimes.com/extraordinaryissue/entry/why-india-is-not-just-delhi

Byaah Nibta Diya!

Achcha kuch arse baad phir likhna shuru kiya. Beech mein logon ne poochha toh humne kaha shaadi toot gayi hai. Log dukhi muh manaate. Hum yeh keh paate ki ab akele zyaada samay milta hai, isliye busy rehte hain, isse pehle hi poochhane vaala dukhi ho jaata. Darasal pichhale 6 mahine mein kai dafa shaadi tooti. Aur bhi kai logon ke baare mein suna. Kuch din aur chalta yeh silsila toh hum maan lete ki shaadiyaan todna fashion mein hai. Achcha hum distract ho gaye.


Hindustani shaadiyon ke baare mein Hindi sahitya mein kaafi kuch likha ja chuka. English lifestyle channels dwaara kaafi kuch cover bhi kiya ja chuka hai. Big Fat Indian Wedding. Humaara aisi shaadiyon mein jaana kam hi hua hai. Apni shaadi todane mein maahir hone ke kaaran humaara maamooli shaadiyon mein jaana bhi kam hi hua hai. Khair. Yahan hum baat karenge Small Slim Indian Weddings ke baare mein.


Yaani saadhaaran, middle class north Indian shaadi. Maaf kijiyega, advertising ki duniya mein taaza mili jaankaari ke anusaar north India mein ab middle class bacha nahin. Sab upper middle class hai. North India Delhi border par lage Haryana ke Gurgaon shehar mein shuru hota hai, aur Gurgaon se jude Rajasthan border par khatam ho jaata hai.


Iske alaava north India mein jo bhi hai voh pre-historic, jikra karne laayak nahin hai. Lucknow, Bhopal, Jaipur, Raigarh, Jhansi, Orai, Bijnaur naamak yeh shehar asal mein hain hi nahin. Bas unka naam map se na udd jaaye is maare sab pretend karte hain ki yeh prajaati zinda hai.


Aap sochenge hum kitna ghoom rahe hain. Arrey, hum baat kar rahe hain inhi sheharon mein hone vaali shaadiyon ki. Toh misaal ke liye maan lijiye ki hum gaye hain Mathura ki ek aisi shaadi mein.


Vaah. Kya bhavya, aalishaan imaarat mein function hai. Door door tak bas roshni hi roshni. Aap khush hokar andar ghusate hain aur seedhe hall ki taraf badh jaate hain.


Hall mein pehla kadam aur aapka rumaal aapki naak par. Uff! Badboo!


Aap agal bagal dekhate hain. Sab jagah sundar sundar log, badhiya badhiya pakvaan. Aap naak par bade sambhaal kar rumaal rakhte hain ki jaise hi koi dekhe, aap rumaal se paseena pochhne ka bahaana kar sakein. AC hall mein paseene-paseene hona phir bhi tameezdaar hai. Badboo ke maare naak par rumaal rakhna badtameezi hai. Jab vadhu ka pita aapko ghar pe invite karne aata hai, voh darasal yeh kehne aaya hai. "Sir, shaadi mein garmi ka bahaana karke AC ki taraf ishaara kijiyega. Ismein aapki bhi izzat ki dekho AC hone ke baad bhi garmi lagti hai, kitne ameer log honge. Aur jab log baar baar AC ki taraf ishaara karenge, sab AC dekhenge. Ismein humaari bhi izzat. Badboo ka pata kisi ko nahin chalna chahiye. Ladke vaalon ka ghar naale ke bagal mein hai. Maine vahan khoob badboo hone ka naatak kiya tha. Isse dahej kam ho gaya."


Ladke vaalon ke yahan yeh jataane se voh kitane gande dhang se rehte hain, dahej ka rate kam hota hai. Agar makhkhi, machhar kaatane lagein toh rate 10% kam hota hai, badboo se 20%. Aur drawing room mein baithe baithe suyar andar aa jaayein toh 50% tak kam hota hai. Iske alaava ghar ki auratein ya bachche yeh jataayen ki yeh toh har din ki baat hai, jaise bachche usse khelna shuru kar den, toh 70% tak discount mil sakta hai dahej par.


Tabhi aapko koi ishaara karta hai kameene carpet ki taraf. Aaye haay. Voh Lal-Hara carpet jiske oopar pehli baar dulhan ne kadam rakha tha san 1900 mein. Uske baad uski dhulaai nahin hui, albatta uss par chalke kai ladkiyon ne shaadi ki aur zindagi bhar ghar bharke kapde dhone ki kasamein khaayin.

Khair, aap bahar nikal jaate hain. Shaadi byaah ke maamle mein kuch bhi gadbad ho toh door hi rehna chahiye. Shaadi mein hum jaise log, matlab niththalle, bhookhe, bahar vaalon ka itna hi role hota hai. Aayo. Kursi khaali hon toh baith jaayo. Jagah na mile toh khade raho. Jab khaana mile kha lo. Koi muskura kar dekhe toh muskuraao. Koi naachne ko bole toh naachne lag jaao. Ladki ka baap haath jod ka muskuraaye, toh nikal jaayo. Aur kahin kuch gadbad lage toh door hatt jaayo.

Baahar door counter dikha Cocktails ka. Vaah Vaah! Shukla ji khoob paisa kamaayen hain. Byaah mein Cocktails. Vaah vaah. Upper middle class shaadi hai. Achcha hai. Pata nahin Shukla ji ka paisa mehnat ka hai ya ghoos ka. Mehnat ka hai toh zaroor piyenge sharaab, jaanane vaale ki mehnat ki kamaai hai. Ghoos ka hai toh bhi theek hai. Ghoos ka paisa sharaab mein peekar uda denge. Kisi ke kaam na aayega.

Yehi soch kar hum matakate hue pahunchate hain Cocktails ke counter par. Kuch kaaran se counter khaali pada hai. Sirf 2-4 log agal bagal mein glass liye khade hain. Hum counter par ek JD maangte hain. Attendant pados vaali halwaai ki dukaan ka ladka hai. Humne kaha tum yahan kaise. Voh kehta hai shaam ko khaana nibta ke nikale ki Shukla ji ne yahan khada kar diya. Bole, chupchaap se khade rehna. Koi angrezi mein kuch bole toh no sir, nothing left bolna. Yeh counter nakli hai.

Tab maajra humein samajh aaya. Asal mein kai shaadiyon mein aise nakli, fancy counter hote hain. Fresh juices, candies, exotic ice creams. Yahan aisa kuch bhi nahin milta hai. Bas shaadi ka contractor kahin se yeh signboard juta leta hai aur table par safed kapda daal kar kisi ko bhi khada kar deta hai. Agar aap baraat ke aane se pehle yahan jaayenge toh aap ladki vaale hain. Sharaab ladke vaalon ke aane ke baad milni start hogi. Agar aap baraat ke aane ke baad jaayenge toh bhaiyya saari sharaab toh kabki khatam ho gayi. Aise counters sirf shaadi mein chaar chaand lagaane ke kaam aate hain. Ab chaand bhi kisi ko naseeb hua hai aajtak. Aur jo agal bagal ladke tehal rahe hain voh ladki ke chhote cousins aur mohalle ke maskhare hain. Jinhein ladki ke baap ne vahan colddrink ka glass pakda kar khada kar diya hai. Jisse lage ki uss counter par bhi kaam zor shor se chal raha hai. Ek aadh ladke ko toh sharaab ke nashe mein hone ke bhi paise milate hain.

Tabhi baraat aa jaati hai. Yeh scene hamesha mujhe baarish ke mausam mein makhkhiyon ki yaad dilaata hai. Baarish mein makhkhiyaan alag-alag ghar mein aish kar rahi hoti ki jaise hi pakode bane, bas sab ekjut hokar ek taraf bhaagin. Shaadi mein baraat aane par bhi sab gate ki taraf bhaagte hain. Bhaiyaa 10 fut ka faatak hai. Aa jaayenge ladke vaale andar. Lekin ladki vaale toh bhaag kar jaayenge, darwaaza block karenge toh baraati bechaare, pata nahin kitni door se beman naachte naachte aa rahe hain, sadak ke sadak par reh jaate hain. Arrey bhai, sadak par hi shaadi karni thi toh itna intezaam kyun karaaya.

Khair. Gate par khade hokar saare baraati naachenge ladki ki behan ke saath. Ladki ki behan ka aise mein bada bura haal hota hai. Jaise hi baraat aati hai, uski saari dost gaayab. Kuch apne aap chhup jaati hain, kuch ki mummyiaan ishaara kar deti hain. Ab bachi ladki ki behan. Aaye haay, 10-12 haathi jaise sharaabiyon ke beech mein akeli. Ladki ki behan haar nahin maanti. Jitne step usne naye 'You're my Soniya' par seekhe the, sab 'Tenu ghodi kinnne chhadhaaya bhootni ke' par nikaal deti hai. Ladke bhi uski dekha dekhi step copy karne lagte hain. Aisi impromptu choreography aur donon pakshon ke beech aisa taalmel dekh kar ladki ke pita aur ladke ka pita ek doosare ko dekhte hain. Vaah. Kya badhiya jamegi humaari. Vaah. Kya Ram milai jodi hai. Udhar ladki ki behan akele 12 habkaane laundon ko sambhaale behosh ho jaati hai.

Ab bas. Jaise hi pehla kadam ladke ne complex mein rakha, aapke kadam badhe food counter par. Bheed umad padi hai sahab. Counter tak pahunchana mushkil hai. Aise mein agar aap ladki vaale hain toh caterer agal bagal ka koi halwaai hi hoga. Aapki jaan pehchaan ka. Agar aap ladke vaale hain toh aapko counter ke peechhe jaane ki suvidha hai. Aapko vahan jaakar sirf yeh bolna hai, "Bhaiyya, jaldi doodh de do. Dulhe ko kamzori ho gayi hai."

Aksar yeh bhi kaafi ajeeb ho jaata hai. Paanch minute mein counter ke peechhe 5 log dulhe ke liye 5 alag cheez maangte hain. "Bhaiyya, dulhe ko mirch lagi, colddrink do." "Bhaiyya, ladke ko chutney feeki lag rahi hai, mirch de do." "Bhaiyya, dulhe ke Papa ki sugar kam ho gayi hai, thodi rasmalai de do." "Bhaiyya, ladke ke Papa ki sugar badh gayi hai, thoda Pav Bhaaji dena." Aise mein aap counter ke peechhe gareeb aadmi se kuch bhi bolenge voh de dega. Shaq karne ki gareeb aadmi ki haisiyat kahan. Aap yeh kehkar ki ladke ki bhabhi khatam ho gayin hain, counter vaale ki joru bhi paar kar sakte hain.

Bas aise hi dhakkamukki mein aap shaadi nibataate hain. Arrey kaun badi baat. Ladki ka pita, ladke ka pita, pundit, yahan tak ki ladka ladki bhi shaadi hi nibta rahe hain. Aap khaana khaate hain, lifaafa oopar pahunchaate hain aur mauka mila toh Pappu photographer se stage par fotu bhi khinchvaate hain. Pichhali kai shaadiyaan humne aise hi kaatin.

Mujhe galat mat samajhiye. Mujhe show-shaa baaji se koi dikkat nahin. Aapka paisa, jaise chahen udaayen. Aaj aur kal mein fansi aise shaadiyon foohadpan ki misaal hain. Jitni jaldi yeh foohadpan khatam hoga, utni jaldi phirse saalon saal chalne vaali shaadiyaan dobaara hone lagengi.

Startup

Kuch dinon se pet kharaab sa raha. Usse pehle mood kharaab tha. Pet aur mood ka bada dhaansoon taalmel hai. Mood theek hota hai toh pet nahin, pet theek hota hai toh mood nahin. Bas isi gorakhdhande mein hum kitne saawan bin ghevar nikaal chuke hain. Ghevar. Khair.

Subah pet ki gudgud se ladte daftar toh pahunch gaye, par daftar aaye hain toh lunch toh karna padega. Arrey bhai, log kya kahenge. Aur toh aur, jo khaana mangvaane, intezaar karne aur khaane ke bahaane do ghante nikalate hain, usmein kya ab jhakk maarte. Daftar pahunchate hi canteen vaale ne bataaya usne kahin se fresh sandwich ki delivery mangvaayi hai. Neki aur poochh poochh. Ghapp kar gaye do sandwich.

Paanch baj gaye. Ab daftar dhai baje pahunchoge toh paanch toh jaldi bajenge hi na. Pet mein gudgud shuru. Kya khaayen, kya khaayen. Dhaabe se mangvaane se achcha balcony se koodna jaan pada. Allah! Mera pet utha le!

Canteen mein taankjhaank kar rahe the ki ek officeboy dheeme se kaan mein phusphusaaya. "Sahab, mere bhai ne neeche canteen kholi hai. Nayi hai, zyaada kuch nahin hai abhi, par aap dekh lijiye agar aapko kuch theek lage."

Ek nazar humne canteen ki khaali shelf par daali, ek apne pet par. Pet ki aisi avastha mein har cheez shaadi ka laddoo hai. Khaao toh maro, na khaao toh maro.

Lambi saans lekar humne bola, "Haan haan. Tumhaare bhai ne kholi hai toh zaroor jaayenge."

Tehalate matakate hum neeche pahunch gaye. Building mein peechhe ki ore basement ki seediyaan thi. Oopar ek peele rang ke chart par dukaan ka naam aur baseline likhi thi. Seediyon par gubbare aur rang birangi sajaavat.

Aakhiri seedhi par ruk gaye. Kahan jaayen. 8X8 ka ek chhota sa khomacha. Usmein 2 fut jagah uske counter ne le rakhi thi, baaki mein ek table aur 2 chair saji thi.

Pehli jhalak mein bachpan ka voh library sajaana yaad aa gaya, jab mohalle ke 4-5 bachche milkar 25 kitaabon ke saath library khol lete the. Aur dhanda takeoff na hone par khud hi galle mein paise daalkar poore din comics padhte. Isi ummeed se maine counter ke peechhe dekha, jaise yeh bhaisahab bhi stool par baithe samose kha rahe honge aur galle mein paise daalte ja rahe honge.

Counter ke peechhe se voh muskuraaya. "Kya khilaaun Sir?"

Maine ek sarsari nazar poore counter par maari. Zyaada kuch na dikha, samose zaroor dikhe. Ados-pados mein kisi halwaai ke yahan bane samose. Tel mein chipude hue. Pet ke liye human bomb.

Main muh banake palatane vaala tha ki badi dheemi si awaaz mein bola. "Kya hua Sir?"

Muskura raha tha, aur darr raha tha ki pehla customer naraaz hokar ja raha hai. Awaaz bhi aise kaanpi jaise main uski exam ki copy jaanch kar muh bana raha hun.

Maine do samose maange. Usne jhatt se jaakar mez saaf ki, napkin sajaaya. Sauce ki bottle khol ke rakhi. Chatni katori mein nikaali. Phir mujhe ishaara kiya.

8X8 ke khomache mein main aise mez ki taraf badha jaise kisi paanch sitaara ke buffet se khaana lekar table ki taraf badha hun.

Samose bhale tel vaale rahe hon, swadisht the. Thodi der mein usne ek steel ke glass mein paani nikaal diya. Phir counter ke peechhe jaakar mujhe khaate dehkane laga. Usse pehle sirf Ma khaana khilaate waqt ek ek kaur par aise dhyaan de paayi hain.

Jaise hi kha chuka, usne muskura ke poochha. "Kaisa tha Sir?"

"Achcha tha." Maine paise diye, usne 2 rupaiye ka discount diya. "Abhi start kiya hai na Sir".

Bahar niklate waqt dara ki pet bol jaayega. Phir laga, kisi ke aise imaandaar startup mein kaam na aa paaye, aisa pet bhi kis kaam ka.

Brand Awareness

Yeh lekh kisi ko neecha dikhaane ke liye nahin hai. Iska maksad kisi ki bhaavnaaon ko thes pahunchaane ka nahin hai. Haan, soch par chot pahunche toh zaroor batayiega.

Aap kapde toh pehanate hi honge? Lekh padh rahe hain toh insaan hi honge, insaan hain toh kapde pehanana laazmi hai, kam se kam is mausam mein toh hai hi. Nahin pehanate toh bhi padh sakte hain. Aur nakli pehanate hain toh zaroor padhen.

Aapke saath hua hai pehle kabhi? Kahin kisi mehfil mein ghuse aur naam ki jagah sunaai pade, "Aa gaye mannequin! Tommy, Nike, Adidas, Zara, CK, FCUK, Springfield, Oliver..."

Jis din ek mannequin par yeh sab ek saath dikhein, maanavjaati ki sabse badi jeet hogi. Moje, baniyaan, chaddi sab dikh raha hai usse aapka. Udhar X-ray machine ijaad karne vaale ki rooh kaanp uthi hai.


Aur phir suniye unki smart shopping ke anginat kisse. "Isi colour ka muffler maine 30 rupaiye mein khareeda. Isse better fitting ki jeans Palika mein milti hai. Aur yeh shirt ka design 4 din mein out ho jaayega, kaahe itna kharcha karte ho iss par?"

Iske peeche videshi taaqat ka haath hai dost.

Brand. ISI ke baad yeh doosra shabd hoga jisse aadhe Hindustan ka khoon khaul uthata hai. ISI ne toh sirf chand jagahon par chot pahunchaayi hai, brand culture ala capitalism toh desh ke kone-kone ko sadiyon se deemak ki tarah chaate ja raha hai.

Agra se bypass kar raha har aadmi bin kaaran 30 km andar jaakar 'Panchchi Petha' se petha khareedta hai. Agra se guzre bina Panchchi ka petha liye? Mohalle vaale kya bolenge. Raaste mein 40 nakli dukaanen padti hain, lekin gaadi sirf asli 'Panchhi Petha' par rukti hai. Umeed karta hun aapne kabhi yeh bevkoofi nahin ki.


Lucknow mein Diwali ke din poore kumbhe ke laundon ko gharvaale subah 6 baje uthate hain aur laat maar ke Chappan Bhog bhejate hain. Tyohaar mein apna yogdaan dene ke liye launde line lagakar subah-savere neend se jhoojhante-jhoonjhate tainaat ho jaate hain.

December ki sard raat mein bachcha do chheekhein zyaada maar de, toh baap monkey cap pehan agal-bagal ke doctor chhod meelon door se bhi family doctor ko uthaane scooter par nikal padta hai.

Bijnaur se 26 km door Lallanpur mein jab ek budhiya PCO se bahar nikal kar poore gaanv ke saamne chhaati faad ke cheekhati hai, "Humaar bitua ka TATA mein ho gaya" toh uski hansi mein capitalism dahaade maar raha hota hai.

Kahin ke pethon ka charm, kisi baap ka bete ke liye pagalpan, kisi Ma ka budhaape mein ghode ki tarah chhalaangen maarna... sab brand culture hai.

Brand culture/capitalism ke aur bhi khaufnaak nateeje hain. Gaanv-dehaat mein basi anginat kapde-jooton ki unregistered factoriyon mein jo 10-10 saal ke launde machinon mein ghuse rehte hain, chaupat kar rahi hain brands unka future. Desi sharaab ke bahaane zehar bech rahe logon ka desh ki jansankhya kam karne ka maksad-e-khuda napaak kar rahi hain brands. Gali-mohalle ke chor-uchakke jo Palika, Nakhkhaas sareekhi jagahon par aapko 'maal' bechate hain, unki kala ka mazaak uda rahi hain brands.

Is tabaahi ko rokane ka waqt aa gaya hai, aye socialism ke rakhvaalon. Brand ka B silent karke har capitalist ke muh par taala lagaane ka waqt aa gaya hai.