kahan jagah hai sabke liye?

Shauk se khareedi voh kitaab
Lko ke ek andekhe, bhoole-pichhade Book Store se
Bhaisahab mamla ban gaya hai yahan Kaanch ke mahalon mein

Padhne ke liye koi shaant kona dhoondane ki voh hinchuk
Andar hi paida hokar aatmahatya kar leti hai
Jab shor-gul mein bhi padhne mein
Chaalis aankhon aur 4,000 sawaalon ke jawaab dene padte hain

Kaisi Rashtriya Bhasha hai yeh
Jisko padho toh log poochh baithate hain, "Dost, Hindi improve kar rahe ho kya?"

Tavaayaf

'main' aur 'tu' ke bolbaale mein,
'hum' aur 'aap' beaabru ho jaate hain,
shabdon ki tehzeeb mein lipti is khoobsurati ko,
aksar log tavayafaana keh jaate hain

Ameer bade kharaab hain

Voh mujhe gaali dete hain, mujhe bina baat ke apne se neeche vale ko deni padti hai,
Voh mujhe kam paise dete hain, mujhe apne naukar ki tankhwaah kaatani padti hai,
Voh mujhpe rob jhaadate hain, mujhe apne se choton se joote ke feete bandhvaane padte hain,

Kyun karaate hain voh mujhse itna paap, thoda sacrifice nahin hota unse?